ការចាប់ដៃគូរវាងក្រុមហ៊ុន Smart និងក្រុមហ៊ុន Razerនឹងផ្ដល់ភាពងាយស្រួលសម្រាប់អ្នកចូលចិត្តលេងហ្គេម ដើម្បីទិញហ្គេមលើកម្មវិធីលេងហ្គេម
តាមរយៈភាពជាដៃគូថ្មីរវាងក្រុមហ៊ុន Smart Axiata និង ក្រុមហ៊ុន Razer អ្នកគាំទ្រវិស័យកីឡាអេឡិចត្រូនិកនៅកម្ពុជា ឥឡូវនេះអាចប្រើប្រាស់ទឹកប្រាក់ក្នុងសមតុល្យចំបងរបស់ក្រុមហ៊ុន Smart យ៉ាងងាយស្រួល និងប្រកបដោយសុវត្ថិភាព ដើម្បីទិញរូបិយប័ណ្ណ និងឥណទានលើកម្មវិធី Razer Gold ដែលពួកគេអាចយកឥណទាននេះទៅទិញ កម្មវិធីហ្គេម និងកម្មវិធីកំសាន្តនានាជាង 34 000 កម្មវិធី។
ដើម្បីអបអរភាពជាដៃគូថ្មីនេះ អតិថិជនក្រុមហ៊ុន Smart អាចទទួលបានការផ្ដល់ជូន ៥០% សម្រាប់រយៈពេលមួយខែ (រហូតដល់ទៅទឹកប្រាក់ស្មើនឹង៥ ដុល្លារ នៃឥណទានហ្គេម Razer Gold អនឡាញ) នៅពេលពួកគេបញ្ចូលទឹកប្រាក់ក្នុងកាបូប Razer Gold យ៉ាងតិចណាស់៥ដុល្លារតាមរយៈសមតុល្យចំបងរបស់ពួកគេ។ ការផ្តល់ជូននេះធ្វើឡើងសម្រាប់ប្រតិបត្តិការចំនួន ៥០ ដងមុនគេបង្អស់រៀងរាល់ថ្ងៃ។
ក្នុងឯកសារវីដេអូដែលត្រូវបានដាក់បញ្ចាំងតាមអនឡាញក្នុងព្រឹត្តិការណ៍សម្ពោធភាពជាដៃគូនេះកាលពីថ្ងៃច័ន្ទ ទី២៨ ខែមិថុនា លោក Adisorn Phonnarut នាយកជាន់ខ្ពស់នៃ Razer Gold បានឲ្យដឹងថា ៖ «តាងនាមឲ្យ ក្រុមហ៊ុន Razer យើងខ្ញុំសូមសម្តែងនូវក្ដីរំភើប ដែលបានធ្វើជាដៃគូជាមួយ ក្រុមហ៊ុន Smart Axiata លើ Razer Gold ដែលអតិថិជន Smart អាចទិញបានយ៉ាងងាយតាមរយៈសមតុល្យចម្បងរបស់ពួកគេ។»
លោកបានបន្ថែមថា៖ «អ្នកលេងហ្គេមនៅទូទាំងពិភពលោកអាចទិញទំនិញតាម Razer Gold ដែលជាប្រភេទឥណទាននិម្មិតរួមបញ្ចូលគ្នានេះបាន ហើយវាអាចត្រូវបានប្រើប្រាស់ក្នុងហ្គេម និងល្បែងកម្សាន្តជាង ៣៤.០០០។ អ្នកអាចប្រើ Razer Gold ដើម្បីទិញហ្គេម និងមាតិកាក្នុងហ្គេមរបស់អ្នក ហើយអ្នកក៏អាចរីករាយនឹងរង្វាន់ផ្សេងៗនៅក្នុង Razer Silver ផងដែរ តាមរយៈ [កម្មវិធីផ្ដល់ជូនអតិថិជនដែលមានភក្ដីភាពមួយ] និងកិច្ចព្រមព្រៀងហ្គេមផ្តាច់មុខនានា»។
កម្មវិធី Razer Silver នឹងត្រូវបានបន្ថែមដោយស្វ័យប្រវត្តិទៅកាន់គណនីរបស់អ្នក ហើយអាចត្រូវបានប្រើប្រាស់ដើម្បីទាញយកអំណោយ និងវត្ថុផ្សេងៗក្នុងពេលលេងហ្គេម។
ការទិញហ្គេមដោយប្រើសមតុល្យចំបងនេះ អាចដំណើរទៅបានដោយសារតែ វាជាផ្នែកមួយនៃការរួមបញ្ចូលគ្នា ក៏ដូចជាការដាក់អោយប្រើប្រាស់កម្មវិធីផ្លាតហ្វមឌីជីថល API របស់ក្រុមហ៊ុន Apigate។
លោក Raja Mansukhani ប្រធានក្រុមហុ៊ន Apigate និង ជាអគ្គនាយកនៃសេវាកម្មហិរញ្ញវត្ថុឌីជីថលនៃ Axiata Digital បានថ្លែងថា៖ «Apigate មានសេចក្ដីសោមន្សរីករាយណាស់ក្នុងការជួយអោយមាននូវការចាប់ដៃគូរវាង ក្រុមហ៊ុន Smart និង ក្រុមហ៊ុន Razer ដែលអនុញ្ញាតឲ្យអតិថិជនរបស់ក្រុមហ៊ុន Smart អាចបញ្ចូលឥណទានទៅក្នុងកាបូប Razer Gold ហើយអាចទិញហ្គេមនិងមាតិកាដែលខ្លួនពេញចិត្តតាមរយៈដំណោះស្រាយដ៏ងាយស្រួលរបស់ខ្លួន។ ពួកយើងមានភាពរីករាយណាស់ក្នុងការបន្ដភាពជាដៃគូបែបយុទ្ធសាស្រ្ដជាមួួយក្រុមហ៊ុន Smart និង ជាផ្នែកមួយនៃការកើនឡើងរបស់ Razer Gold ដោយផ្ដល់នូវមធ្យោបាយដែលពួកគេអាចសម្រេចបាន»។
ក្រុមហ៊ុន Smart ឱ្យដឹងថានេះគឺជាភាពជាដៃគូផ្តាច់មុខលើកដំបូងសម្រាប់ក្រុមហ៊ុនទូរគមនាកមន៍កម្ពុជា ដែល ផ្តល់ជូនសេវានេះ។
លោក Thomas Hundt អគ្គនាយករបស់ក្រុមហ៊ុន Smart Axiata បានថ្លែងថា៖ «យើងមានក្តីរីករាយយ៉ាងខ្លាំងដែលអាចចាប់ដៃគូជាមួយក្រុមហ៊ុនហ្គេមដ៏មានឥទ្ធិពលនេះ ដោយសារក្រុមហ៊ុន Razer នឹងនាំមកនូវការផ្តល់ជូនពិសេសដល់អ្នកលេងហ្គេមរបស់យើង និងលទ្ធភាពប្លែកពីគេដើម្បីទិញលើ Razer Gold ដោយប្រើប្រាស់ គណនីចម្បងរបស់ Smart។ ការលេងហ្គេមតាមឧបករណ៍ចល័ត និងកីឡាអេឡិចត្រូនិចកំពុងមានប្រជាប្រិយភាពមិនធ្លាប់មាននៅកម្ពុជា ហើយយើងតែងតែស្វះស្វែងរកវិធីផ្សេងៗ ដើម្បីគាំទ្រដល់សហគមន៍កីឡាអេឡិចត្រូនិចរបស់យើងជាមួយនឹងកិច្ចព្រមព្រៀងល្អៗ ដើម្បីឱ្យពួកគេអាចបន្តលេងហ្គេមដោយគ្មានការរំខានមិនថានៅទីកន្លែងណាទេ»។
លោក Thomas បានបន្ថែមថា៖ «តាមរយៈភាពជាដៃគូនេះ អ្នកជាវហ្គេមរបស់យើងឥឡូវនេះក៏នឹងអាចរីករាយនឹងបទពិសោធលេងហ្គេមកាន់តែរលូនថែមទៀតផងដែរតាមរយៈផ្សារលេងហ្គេម Leng Center ដែលអាចចូលលេងបានតាមរយៈកម្មវិធីទូរស័ព្ទដៃ SmartNas របស់យើង»។
ដើម្បីទិញ Razer Gold និងរីករាយនឹងការផ្តល់ជូនបន្ថែម ៥០% អតិថិជនគ្រាន់តែចូលទៅកាន់គេហទំព័រ gold.razer.com និងជ្រើសរើសយកវិធីបង់ប្រាក់តាមរយៈ Smart សម្រាប់ការទិញរបស់ខ្លួននៅពេលដែលផ្ទាំងបង្ហាញពីការបង់ប្រាក់លោតចេញឡើង។ អ្នកជាវសេវាលេងហ្គេម ត្រូវមានទឹកប្រាក់ចម្បងគ្រប់គ្រាន់ដើម្បីបញ្ចប់ប្រតិបត្តិការ ៕
សម្រាប់ព័ត៌មានបន្ថែម សូមតាមដានទំព័រហ្វេសប៊ុករបស់ក្រុមហ៊ុន Smart Axiata តាមរយៈ www.facebook.com/smartaxiata ឬចូលទៅកាន់គេហទំព័រ www.smart.com.kh។